Fushata e partive politike, PBDNJ miting në Berat, PD miting në Tropojë – (14 Shtator 2000)
Lajme Arkiva – TV Klan 2000
Kryetari i Partisë Bashkimi i të Drejtave të Njeriut, Vasil Melo, ishte mes elektoratit të rrethit të Beratit. Ai prezantoi kandidatët për kryetar të bashkisë, si dhe disa kandidatë për komunat në këtë rreth. Ai në këto takime theksoi se kandidatët e kësaj partie, do të punojnë për elektoratin dhe do të zgjidhin problemet më emergjente që preokupojnë beratasit. Melo i premtoi elektoratit të tij se partia e tij do të mundohet të organizojë emigracionin sezonal në vendet fqinje.
Partia Demokratike kërkoi të mërkurën mandatin e votuesve, për të mbajtur qeverisjen vendore dhe pas 1 Tetorit në bashkinë e qytetit të Bajram Currit. Në mitingun e organizuar në sheshin e qytetit, nënkryetari i Partisë Demokratike Jemin Gjana, prezantoi kandidatin e PD për postin e kryebashkiakut të Bajram Currit, Shpend Demiri. Kandidati Demiri premtoi pastrimin e qytetit ruajtjen e rendit dhe zgjidhjen e problemeve të strehimit./tvklan.al