Vdekja e turistit rus, policia arreston biznesmenin
Një ditë pas ngjarjes tragjike në plazhin e Himarës, ku një skaf goditi për vdekje një turist rus, policia ka arrestuar një person si të dyshuar.
Ai është Fatmir Kuçi, 44 - vjeç, nga Elbasani. Biznesmeni është arrestuar me urdhër të Prokurorisë, si i dyshuar për akuzën e “vrasjes nga pakujdesia”. Policia njoftoj zyrtarisht se rreth orës 11:00 të së mërkurës, në zonën bregdetare të quajtur “Livadh” të Himarës, 44 - vjeçari, duke drejtuar mjetin lundrues tip “skaf - plastik”, me mbishkrimin “Black Arrow”, ka dëmtuar aksidentalisht Denis Kaiumov, i cili ka gjetur më pas vdekjen në spitalin e Himarës. Fatmir Kuçi ka dëshmuar para oficerëve të Policisë Gjyqësore se nuk e ka goditur ai shtetasin rus, por thjesht i ka dhënë ndihmën e parë.Pashë një person që po kërkonte ndihmë dhe shkova për ta ndihmuar në një distancë prej rreth një milje nga bregu,
ka thënë ai. Por nisur nga tre plagët e gjetura në trupin e viktimës, si dhe tre motorët e skafit, grupi hetimor ka dyshime të forta se ngjarja është shkaktuar nga pakujdesia. Nga ana tjetër janë dokumentuar edhe disa dëshmi të banorëve të zonës, që kanë deklaruar se e kanë parë të plagosurin rreth gjysëm milje larg bregut dhe skafin që ishte pranë tij. 43 - vjeçari Denis Kaiumov vinte për herë të parë në Shqipëri. Sipas të dhënave, ai rezulton të ketë hyrë në vendin tonë me datën 24 Korrik, bashkë me familjen nga pika kufitare e Qafë Thanës. Nga Policia Kufitare e stacionit Dhërmi nuk është lejuar që skafi i Kuçit të dalë në det, për arsye se në dokumentacion kishte mungesën e siguracionit të mjetit. Në rastin konkret, ky shtetas ka dalë pa lejen e Policisë Kufitare në det.
Policia ka konfiskuar 2 mjete lundruese në përdorim dhe në pronësi të Kuçit: Mjetin lundrues skaf - plastik me mbishkrimin “Black Arrow”, 11.73 metra i gjatë dhe 3.20 metra i gjerë, me 3 motorë – 275 KF secili dhe mjeti lundrues motor - deti, me emrin “Viktoria - 3”, pa dokumentacion përkatës.
Fatmir Kuçi është një biznesmen i rëndësishëm në fushën e ndërtimit, pronar i kompanisë “Victoria Invest” e shtrirë në Shqipëri, Kosovë dhe Maqedoni.
Tv Klan