Izraeli nis vaksinimin e 16-vjeçarëve
Franca në krye të listës europiane me shifrat e infektimeve
Izraeli vazhdon të ketë në fuqi prej fillimit të Janarit, bllokimin e tretë kombëtar, një ndër masat më të ashpra për frenimin e përhapjes së koronavirusit. Por pavarësisht kësaj, shifrat e infektimeve ditore janë në nivele rekord prej gati 9 mijë rastesh.
Kjo situatë nuk e ka penguar që të jetë në krye të të gjitha vendeve përsa i përket ritmeve të vaksinimit të popullsisë. Nga kjo e Enjte, vaksinimi nis edhe për të gjithë ata që janë 16 vjeç e sipër. Mbi 37% kanë marrë të paktën dozën e parë, ndërsa 1/5 e qytetarëve i kanë marrë të dyja dozat.
Në shkallë globale shifrat vijojnë të jenë të qëndrueshme. Në Europë, Franca kryeson me infektimet ditore që këtë 24-orësh ishin në mbi 26 mijë raste. Nga të dhënat zyrtare rezulton se 14% e rasteve të reja janë të infektuar me mutacionet e Covid-19 që po qarkullojnë nëpër botë, kryesisht me variantin britanik. Teksa përhapja e infeksioneve duket nën kontroll, Britania e Madhe prin këtë 24 orësh me shifrat e viktimave në kontinent me mbi 1 300 raste.
Tv Klan