Kalifornia vijon të përballet me zjarret masive
Zjarri gjigant që përfshiu të marten Kaliforninë vijon të përhapet, duke vënë në rrezik jetën e banorëve të zonës dhe duke shkatërruar gjithçka i del përpara.
Flakët kanë dalë jashtë kontrollit, pavarësisht përpjekjeve të jashtëzakonshme të më shumë se 1500 zjarrfikësve, një pjesë e mirë e të cilëve thonë, se ky është zjarri më i madh që kanë parë ndonjëherë.
Një ditë më pare, autoritetet evakuuan 82 mijë persona, vetëm pak km nga Los Angeles. Rrezja e flakëve ka arritur në mbi 12 mijë hektarë, duke përpirë mijëra shtëpi.
Dëshmitarët thanë për mediat amerikane, se flakët kanë shkaktuar një stuhi prej hiri që i përngjan shiut. Kalifornia vuan prej 5 vitesh nga një thatësirë e skajshme që ka tharë pyjet dhe është përfshirë nga një valë e nxehtë, me temperaturat që i kalojnë 40 gradë celcius.
Katastrofat natyrore morën të tjera jetë njerëzish në SHBA, ku 11 persona humbën jetën, si pasojë e përmbytjeve masive të ditëve të fundit.Më shumë se 20 mijë banorë janë shpëtuar dhe evakuuar nga zona e rrezikut, ndërsa Presidenti Obama deklaroi emergjencën federale.
Tv Klan