• Shpërndaje

Rrezikohen zonat turistike në Qerret

“Kanalet kulluese në Qerret të Kavajës janë kthyer në një problem për ndotjen, pasi në të hidhen mbetje që rrjedha e ujit i çon më pas në det”.

Kanë mbetur fare pak metra që këto mbetje urbane përgjatë këtij kanali kullues të përfundojnë në Adriatik.

Situata përsëritet çdo vit. Ujërat e këtyre kanaleve përshkojnë kilometra të tëra duke marrë me vete mbetjet urbane dhe natyrore.

Në Bordin e Kullimit janë në dijeni të kësaj problematike, por përgjegjës bëjnë banorët e zonës që i përdorin kanalet kulluese si vend-depozitime të mbeturinave të ndryshme.

 “Ne kemi nisur me pastrimin. Të gjitha mbetjet nga punimet që bëjnë nëpër shtëpi, pastrimet nëpër oborret e vilave i hedhin në mes të rrugës ose nëpër kanalet dhe ikin duke mos na sinjalizuar”, thotë Ledio Hysa, drejtori i Shërbimeve Publike në Bashkinë e Kavajës.

Bordi i Kullimit premton për një zgjidhje të shpejtë e të qëndrueshme.

“Të gjitha komplekset do të kenë koshat dhe për çdo problem do të marrin dikë nga bashkia ose nga firma e pastrimit, pra do të lihen numrat e kontaktit në dispozicion për çdo problematikë që do të kenë”.   

Por për ta parandaluar ndotjen nuk ka asnjë masë. Asnjë nga personat që hedhin këtu mbetje e inerte nuk është kapur për t’u proceduar sipas ligjit.

Për këtë arsye, ndotja ka gjasë të rikthehet edhe pas pastrimit nga bordi i kullimit e të prekë edhe këtë hapësirë bregdetare që thith mijëra turistë çdo vit.

Tv Klan