Koronavirusi ndal sportin
UEFA shtyn të gjitha ndeshjet e javës së ardhshme
Koronavirusi po ndalon gjithçka dhe sporti nuk bën përjashtim. UEFA shtyu të gjitha ndeshjet e javës së ardhshme, përfshi turnetë e moshave të organizuara prej saj.
Të martën do të vendoset për të gjithë akivitetet ndërkombëtare dhe kombëtare. Kampionatet më të rëndësishëm të Europës po ndalen. Shembullin e Italisë e Spanjës e ndoqi edhe Anglia, Franca e Gjermania.
Federata franceze ndaloi menjëherë futbollin në të gjithë nivelet prej kësaj të premteje, ndërsa Liga Angleze pezulloi gjithçka deri në 4 Prill pas konsultimit me klubet.
Vendimi erdhi pas disa rasteve pozitivë në ekipet e Premier League. Në Gjermani fillimisht u mendua që të luhej pa tifozë edhe kjo javë, por më pas u vendos pezullimi deri më 2 Prill.
Masa dhe në Amerikën e Jugut ku FIFA pezulloi xhiron e kualifikueseve të Botërorit 2022 që ishte parashikuar të mbahej nga 23 deri më 31 Mars. Koronavirusi u bë pengesë edhe për nisjen e sezonit të ri të Formula 1. Një pjesëtar i ekipit të McLaren rezultoi pozitiv në kontroll dhe FIA vendosi të mos zhvillojë garën e Melburnit, Bahrenit dhe Vietnamit.
Tv Klan