Kultivuan kanabis në muajt Shtator-Tetor, arrestohet 35-vjeçari, në kërkim bashkëpunëtori
Një person është arrestuar dhe një tjetër është shpallur në kërkim pasi policia ka zbuluar se të dy në bashkëpunim me njëri-tjetrin janë autorë të kultivimit të kanabisit në Vlorë.
Në pranga ka rënë E.I. 35 vjeç dhe në kërkim është L.I. 30 vjeç. Policia thotë se këta dy persona kanë kultivuar bimë kanabisi në vende të ndryshme në fshatin Mërtiraj të Selenicës gjatë muajve Shtator dhe Tetor.
Kjo u provua falë një hetimi 1-mujor të autoriteteve vendore. Po kështu, në banesën e 30-vjeçarit që është i shpallur në kërkim, u gjetën 1.1 kg kanabis dhe 1 automatik.
Materialet i kaluan Prokurorisë së Vlorës për veprime të mëtejshme hetimore. /tvklan.al