La Liga pa tifozë për 2 javë
Mbyllen dyert për disa ndeshje në Bundesliga 1
Rreziku i përhapjes së koronavirusit ka përfshirë edhe futbollin spanjoll. La Liga, por edhe kategori më të ulëta do të zhvillojnë ndeshjet në 2 javët e ardhshme me stadiume të boshatisura.
Vendimi është marrë këtë të martë nga Liga Spanjolle e Futbollit dhe autoritetet, si masë parandaluese në një vend ku numri i të prekurve është më shumë se 1200 dhe i viktimave mbi 30. Pa tifozë do të luhet edhe sfida Barcelona-Napoli më 18 Mars në “Camp Nou”.
Pa publik do të zhvillohen ndeshjet në kampionatin francez. Vendimi për stadiume të mbyllura për spektatorët është vlefshëm deri më 15 Prill. Nga situata preken edhe ndeshjet ndërkombëtare që do të mbahen në territorin francez.
Masa janë marrë edhe në ndeshje të Bundesliga 1. Përballjet derbi Borussia Dortmund-Schalke dhe Borussia Monchengladbach-Koln do të luhen pa tifozë.
Bayern Munchen pritet të mbyllë dyert e “Allianz Arena” për 3 ndeshjet e radhës përfshi takimin me Chelsea në Champions League. Sipas mediave gjermane në Landin e Bavarisë nuk lejohen grumbullime mbi 1 mijë persona.
Tv Klan