Marijuanë me skafe nga Lezha, si funksiononte grupi kriminal
Policia italiane ka dhënë detaje sa i përket grupit kriminal që u shkatërrua ditën e djeshme, i drejtuar nga shqiptarët dhe që e kishte qendrën në Bari. Në krye të rrjetit të drogës ishte 47-vjeçari shqiptar me pasaportë italiane, Roland Lame, i cili u kishte shpëtuar prangave në një operacion të mëparshëm të anti-drogës.
Ishte pikërisht Lame, së bashkë me djalin e tij Fabio Lame, 25-vjeç, ai i cili mbante kontaktet me trafikantët në Shqipëri dhe organizonte futjen e marijuanës në rajonin e Puljas. Shqiptarët e tjerë të arrestuar janë: F.A. 33 vjeç, H.A. 49 vjeç , A.S. 26 vjeç. Përveç trafikut të drogës nga Shqipëria drejt Italisë, grupi trafikonte edhe në Holandë.
Gjatë operacionit të koduar "Iliria", policia sekuestroi 1.2 ton marijuanë, 20 kg substanca holluese të drogës, nga 1 kg kokainë e heroinë, 4.5 kg tritol, 1 kallashnikov, një sasi e konsiderueshme plumbash dhe disa detonatorë eksplozivi.
Nga hetimet ka rezultuar se ata përdornin kode për të komunikuar dhe kjo e ka bërë më të vështirë përgjimin e tyre. Gjithashtu mësohet se droga nisej me skafe apo mjete të tjera lundruese nga Lezha./tvklan.al