Masakra në klubin e natës, të mbijetuarit rrëfejnë tmerrin që panë me sy
Të mbijetuarit e sulmit në Stamboll kanë rrëfyer sesi festimet u kthyen në një masakër.
Ata treguan sesi turma e të pranishmëve në klubin e natës u mbërthye nga paniku, kur një person nisi të qëllonte me armë zjarri në drejtim të tyre. Të paktën 39 persona humbën jetën si pasojë e këtij sulmi në klubin Reina të Stambollit, më pak se dy orë nga hyrja e vitit 2017. Rreth 69 është numri i të plagosurve, të cilët po marrin ndihmë mjekësore, ndërsa policia po zhvillon një operacion të gjerë për të kapur autorin e dyshuar të kësaj ngjarje të rëndë. [caption id="attachment_246077" align="aligncenter" width="790"]
Klubi Reina[/caption]
Megjithatë, siç shkruan BBC, ata që arritën të mbijetonin shprehen të surprizuar që numri i viktimave nuk është më i lartë.
Futbollisti Sefa Boydas duke folur për AFP tha se iu desh që të ecte mbi trupat e pajetë për t’u larguar nga lokali, ku kishte vetëm 10 minuta që kishte mbërritur.
“Sa po zinim vend, kur nga dera u pa shumë pluhur dhe tym. Në atë moment nisën të shtënat me armë. Kur u dëgjuan këto zhurma, shumë prej vajzave i ranë të fikët.”
Një tjetër dëshmitare, bashkëshorti i së cilës mbeti i plagosur, tregoi për trupat e pajetë të shtrirë përtokë. “Përpara se të kuptoja çfarë po ndodhte, im shoq ra përtokë përpara syve të mi”
, tha Sinem Uyanik, duke folur jashtë spitalit Sisli në Stamboll.“M’u desh të hiqja trupat që kishin rënë mbi mua për të dalë prej aty”.
“Po kalonim shumë bukur kur papritur gjithçka u shndërrua në kaos dhe në një natë horrori
”, rrëfeu Maximilien, një turist italian. Ndërsa Ismail Celebi, i cili ndodhej në anën tjetër të rrugës nga klubi Reina tha se kishte parë njerëz që vraponin dhe shtypnin njëri - tjetrin, pasi kishte dëgjuar të shtënat me armë. Zyrtarët thonë se autori fillimisht vrau një oficer policie dhe një person që ndodhej jashtë klubit, përpara se të futej brenda. Mehmet Dag e pa këtë të ndodhte para syve të tij.“Qëlloi fillimisht policin që ndodhej jashtë dhe mbi të tjerët që ndodheshin pranë e më pas u fut brenda. Nuk di çfarë ndodhi më tej. Dëgjoheshin të shtëna me armë dhe pas dy minutash një zhurmë shpërthimi”.
Në klub ishin të paktën 700 persona kur ndodhi ngjarja e rëndë. /tvklan.al