Mblidhet kryesia e Federatës Shqiptare të Basketbollit – (12 Shkurt 2001)
Lajme Arkiva – TV Klan 2001
Basketbolli shqiptar do të jetë gjithnjë e më tepër prezent në aktivitetet ndërkombëtare të vitit 2001. Mbledhja e sotme e kryesisë së Federatës Shqiptare të Basketbollit, ka miratuar pjesëmarrjen e skuadrave të ndryshme, si për femra dhe për meshkuj, në veprimtaritë ndërkombëtare të vitit në vazhdim.
Djem dhe vajza të reja, të moshës 13-14 vjeç, do të inkuadrohen në aktivitet e quajtura “Bam pasarela”, gjatë periudhës së verës. Gjithashtu ekipi përfaqësues i të rinjve, do të jetë i pranishëm në turneun e promocionit që zhvillohet në Maltë në mesin e muajit Korrik. Kryesia e Federatës së Basketbollit ka siguruar dhe gjetjen e fondeve për pjesëmarrjen në lojërat mesdhetare.
Gjithashtu drejtuesit e Federatës Shqiptare të Basketbollit, vunë theksin edhe në modernizimin e infrastrukturës, ku së shpejti në pallatin e sportit “Asllan Rusi”, do të vendosen tabelat e reja elektronike. Në këtë mbledhje janë caktuar dhe kryetarët e komisioneve të FSHB./tvklan.al