Merkel dhe Orban të ndarë për emigrantët
Pas arritjes së dakordësisë brenda koalicionit qeverisës, Gjermania ka nisur bisedimet me vendet europiane për ngritjen e qendrave të tranzitit në kufirin e saj. Kancelarja gjermane Angela Merkel priti në Berlin kritikun e saj kryesor, kryeministrin hungarez Viktor Orban. Largësia në vizion mes dy liderëve u pa qartë edhe në konferencën e përbashkët për shtyp.
“Shpirti i Europës është humanizmi. Nëse duam ta mbajmë këtë shpirt dhe të luajmë një rol me këto vlera, atëherë nuk mund të shkëputemi nga sakrificat”,
tha Merkel
.
Ndërsa Orban deklaroi se
“Nëse ndihma e dhënë nga Europa çon në përfundimin se popujt afrikanë dhe aziatikë mund të vijnë te ne, atëherë ata do të vijnë. Ne duhet të tregohemi njerëzorë pa krijuar nxitje për t’i pritur këtu. Mënyra e vetme është mbyllja e kufijve dhe dhënia e ndihmës për këto vende”.
Në bisedime intensive është përfshirë edhe aleati në koalicion i Merkelit, ministri i brendshëm Horst Zehofer, i cili takoi në Austri kancelarin Sebastian Kurz. Berlini dhe Vjena ranë dakord të angazhohen për mbylljen e të ashtuquajturës rruga e Mesdheut dhe parandalimin e fluksit përtej kufijve të Europës.
Tv Klan