Meta pret në takim ministrin turk
“Investimet turke janë të mirëpritura”
Pas takimit me homologun shqiptar, ministri i Punëve të Jashtme të Turqisë, Mevlüt Çavuşoğlu u takua me Presidentin e Republikës Ilir Meta. Gjatë takimit Meta e falenderoi ministrin për solidaritetin dhe ndihmën e menjëhershme të dhënë nga autoritetet turke pas tërmetit të 26 Nëntorit 2019, si dhe i shprehu ngushëllimet për viktimat e tërmetit dhe ortekut në Turqi.
Kreu i shtetit vlerësoi marrëdhëniet e shkëlqyera tradicionale mes dy vendeve dhe popujve tanë, si dhe theksoi rëndësinë e përmirësimit të mëtejshëm të klimës së biznesit dhe rritjes së investimeve turke në veçanti në vendin tonë.
“Shqipëria dhe Turqia kanë ende një potencial të jashtëzakonshëm për të forcuar më tej marrëdhëniet në të gjitha fushat, veçanërisht ekonomike-tregtare. Investimet turke janë të mirëpritura”,u shpreh Presidenti Meta.
Mësohet se kreu i shtetit ka nënvizuar domosdoshmërinë e forcimit të bashkëpunimit në luftën kundër terrorizmit dhe ekstremizmit, si dhe ka vlerësuar rolin e rëndësishëm të Turqisë për stabilitetin dhe sigurinë në rajonin tonë./tvklan.al