Mister vdekja e shqiptarit në Marsejë
Një ditë pas vdekjes së shqiptarit Florenc Beqiri në Francë, të afërmit e tij në Shkodër kërkojnë të zbardhet e vërteta. 23-vjeçari u arrestua nga policia franceze tri javë më parë pasi nuk kishte dokumente qëndrimi. Sipas familjarëve ai kishte dy vite që ishte larguar nga Shkodra për në Francë, ku punonte si shitës në një treg. Për tri javë Florenc Beqiri u mbajt në një burg të Marsejes dhe katër ditë më parë u dërgua në spital në gjendje kome. Familja bënë apel që trupi i pa jetë i Flornecit të sillet në Shqipëri….
Laureta Beqiri, e ema:
“Telefonata e fundit e djalit ka qenë në 8 Tetor, djali kishte shku pa letra, ma kishte kapur policia se djali ishte pa letra, kush kanë qenë atje, policia e Francës më thanë që djali ka vdekur. Pse po ma sjellin djalin të vdekur”.
Hije dyshimi rreth vdekjes së 23 vjeçarit shqiptar hedh edhe gazeta lokale e marsejës, La Provence, që ngre pikëpyetje se si ka mundësi që një djalë i ri i cili priste me padurim të kthehej në shtëpi te të afërmit për Krishtlindje, t’i japë fund jetës duke u vetëvrarë. Sipas shoqatës së refugjatëve në Francë, më 11 dhjetor Florenci kishte kërkuar vullnetarisht të kthehej në Shqipëri, një kërkesë e cila i ishte pranuar për në datë 15 Dhjetor.
Mister mbetet gjithashtu edhe burgu ku qëndronte shqiptari. Në vetëm një muaj në burgun e Marsejës janë regjistruar 7 tentativa për vetëvrasje, shkruan La Provence, e cila shpjegon se gjendja psikologjike e të dënuarve është e rëndë dhe mungon mbikëqyrja e duhur.
Të premten Ministria e Jashtme tha se ende nuk ka një version zyrtar të ngjarjes dhe se po pritet përfundimi i hetimeve. nga komunikimi me autoritetet policore ishte mësuar se Beqiri qëndronte në spitalin Nord të Marsejës, dhe po mbahej në jetë nëpërmjet aparaturave me oksigjen, pasi ishte pa asnjë shpresë për jetën për shkak të mosfunksionimit të trurit. Sipas informacioneve paraprake Beqiraj, kishte tentuar të kryente vetëvrasje ne burgun e Maresejes.
Tv Klan