Napoli fiton sërish
Napoli fitoi edhe në fushën e Cagliari, suksesi i dhjetë radhazi në kampionat. Ekipi kryesues i Serie A triumfoi me rezultatin 5 – 0, duke forcuar pozitat në krye, 4 pikë i shkëputur nga Juventus që nuk luajti me Atalanta për shkak të kushteve të motit në Torino. Elseid Hysaj tregoi aftësitë e tij jo vetëm në mbrojtje në përballjen me Cagliari.
Mbrojtësi i kombëtares shqiptare dha pasimin për golin e dytë të napolitanëve, duke treguar vendosmëri. Një lojë grupi e Napoli, pasi golat u shënuan nga 5 futbollistë të ndryshëm.
Callejon, Mertens, Hamsik, Insigne dhe Mario Rui vendosën triumfin e skuadrës së Sarri që kërkon titullin e parë kampion pas 28 vitesh. Ndeshjet e radhës me Roma në shtëpi dhe Inter në transfertë do të jenë të rëndësishme për arritjen e objektivit.
Tv Klan