Në dasmën Romanov, të pranishëm Princ Leka e Princeshë Elia
Dasma historike e Princit rus, George Romanov dhe bashkëshortes së tij, Rebbecca Bettarini mblodhi familje mbretërore nga e gjithë bota. Midis emrave të aristokracisë, gjendej edhe ajo e monarkisë shqiptare, Princ Leka Zogut dhe Princeshës Elia Zaharia.
Princ Leka, me anë të një postimi në rrjetet sociale ka bërë të ditur praninë e tij në ngjarjen e rëndësishme të kurorëzimit, për të cilën ka zbuluar se ndodhej në rolin e dëshmitarit.
“Të dashur miq,
Fundjavën e kaluar kam pasur kënaqësi të marr pjesë në martesën historike të Princit Imperial George Romanov dhe Princeshës Victoria Romanovna, si dëshmitar i dasmës së tyre.
Për ne ishte lumturi shumë e madhe të përjetonim kurorëzimin e dashurisë së dy miqve tanë, dy të rinjve të mrekullueshëm që meritojnë gjithë bekimet dhe lumturinë e botës!
St. Pitersburgu u gjallërua nga kjo dasmë fantastike që mikpriti të ftuar nga e gjithë bota, duke shpërfaqur madhështinë e një vendi me histori dhe tradita europiane. 100 vite pas revolucionit, Rusia na dhuroi një dasëm mbretërore si në përralla! Fjalimi prekës i Dukeshës së madhe Maria do mbetet nga më të ndjerët: Paraardhësit tanë sonte buzëqeshin atje lart në qiell…”, shkroi Princi në fotot e postuara.
Në një postim më të hershëm, Princi tregon se në nder të kësaj martese pati edhe ngjarje të tjera të rëndësishme, si një darkë në të cilën, Dukesha e Madhe Maria Romanovna e dekoroi me urdhrin e Shën Andresë, më i rëndësishmi mes urdhërave perandorakë rusë.
“Me rastin e dasmës së trashëgimtarit të familjes Romanov, Dukës së Madh George Romanov u zhvilluan disa evente të ndryshme.
Darka e parë ishte shumë e veçantë për mua pasi Dukesha e Madhe Maria Romanova më dekoroi me urdhërin e Shën Andresë (St. Andreë), themeluar nga Car Pjetri i Madh, më i rëndësishmi i urdhërave perandorakë rusë.
Ky dekorim ishte gjesti më i bukur në vlerësim e miqësisë midis dy familjeve tona”./tvklan.al