Nis rregullimi i trotuareve në rrugët kryesore të Tiranës (29 Janar 1999)
Viti 1999 ka nisur me punë. Jo sepse janë hapur vende të reja pune , por “të dikurshmit” janë duke punuar. Pas shumë vitesh që nuk dëgjohej zhurma e kazmave apo lopatave, ato kanë hyrë në funksionim vetëm sivjet. Jo vetëm punohet për të prishur kioska por rregullohen rrugë.
Ndërmarrja Rrugë Kanalizime është shpërndarë nëpër trotuare. Sot po punohet në Rrugën e Kavajës. Dy brigada prej 15 vetësh kanë marrë në ngarkim që këto trotuare tregtarësh të kthehen në trotuare këmbësorësh. Puna e kësaj ndërmarrjeje e nisur këto ditë me shi, ka penguar disi kalimtarët të bëjnë pazaret në tregun e ndodhur aty.
Megjithëse Bashkia ka vendosur të ndalojë shitjen nëpër trotuare ata sërish vazhdojnë të shesin. Më shumë se këmbësorët janë kënaqur tregtarët të cilëve kjo ndërmarrje po ju shtron vendin e punës. Gjithsesi shpresohet që kjo punë e nisur nga pronarët e dyqaneve luksoze përpara dyerve të tyre të përfundojë nga ndërmarrja e caktuar për të rregulluar rrugën për të gjithë./tvklan.al
Gazetare : Holta Zhiti