• Shpërndaje

Zgjedhja e Presidentit të vendit ka qenë një nga zhvillimet më të diskutuara të javëve të fundit. Mbrëmjen e sotme në emisionin “Opinion” në Tv Klan për të diskutuar rreth kësaj teme ishte i ftuar në studio kryeministri Pandeli Majko. Lidhur me kandidaturën e Alfred Moisiut, kryeministri tha se bashkëpunimi mes tyre nga pikëpamja politike nuk mund të vihet në dyshim.

“Procesi është i natyrshëm dhe zgjedhja e këtij presidenti mbart brenda një koncept të gjerë politik. Kemi të bëjmë me një president të zgjedhur nga nja tryezë e përbashkët. Nga ana personale unë me Presidentin Moisiu ndaj një miqësi të vjetër e cila lidhet me krijimin e shoqatës së Atlantikut ku kanë qenë edhe figura të tjera të politikës shqiptare. Mënyra se si e drejtoi Moisiu këtë shoqatë bëri që të mos ndahej pasi në shumë vende të tjera ka tre ose katër shoqata të Atlantikut. Ai ka dhënë prova për mbajtjen e balancave edhe më parë”, u shpreh Majko./tvklan.al