PD: Karteli i Ramës i pandalshëm, drogë me skafë, avionë dhe makina
Pak orë pas sekuestrimit të një gomoneje me një ton marijuanë, që ishte nisur nga Shqipëria drejt Brindizit, Partia Demokratike deklaroi se karteli i drogës nën qeverisjen e Kryeministrit Rama nuk ka të ndalur. Kreu i Departamentit të Rendit dhe Sigurisë në PD, Enkelejd Alibeaj tha se ky biznes kriminal është shtrirë në mbarë vendin me bekimin e kreut të qeverisë.
“Sot në Brindizi të Italisë është kapur një skaf me 1 ton drogë, ngarkesë e nisur nga grykderdhja e Vjosës, zona e influencës së habilajve të Tahirit. Janë kapur po sot, duke u futur në Maqedoni disa thasë me drogë. Me makinë, me avionë, me skafe, në çdo lloj rruge, mjeti e forme, tonetala me drogë nisen çdo ditë drejt Europës nga karteli i Edi Ramës.
Droga e kartelit të Edi Ramës po mbulon dhe vendet fqinje. Shqipëria për fat të keq është në hartën e zezë, është kthyer në ditët më të këqia, si prodhuesja dhe trafikuesja kryesore e narkotikëve në Europë.”
Sipas Partisë Demokratike, droga po mbulon dhe vendet fqinje, duke e vendosur Shqipërinë në hartën e zezë si prodhuesja dhe trafikuesja e narkotikëve dhe zgjidhja thotë opozita është ndalimi i Kryeministrit Rama.
Tv Klan