• Shpërndaje

Partia Demokratike ka reaguar sot ndaj një deklarate të ministrit të Rendit Spartak Poçi, në të cilin ai shprehet se në Kukës rendi është plotësisht i stabilizuar dhe se nuk ka patur asnjë problem ditët e fundit. Deklarata e ministrit të Rendit është bërë pas deklaratës së autoriteteve lokale për heqjen e drejtorit rajonal të policisë. Ministri Poçi ka hedhur poshtë këtë kërkesë duke e motivuar në shkeljen e rregullave dhe ligjeve të policisë. Asnjë objekt politik nuk ka të drejtë të kërkojë heqjen e drejtuesve të lartë të rendit.

Partia Demokratike ka lidhur kërkesën për heqjen e drejtorit të policisë me mungesën e rendit. Ajo ka deklaruar sot se rendi në Kukës lë shumë për të dëshiruar. Sipas zëdhënësit Edi Paloka, rastet e ditëve të fundit kanë qenë të shumta si grabitja e kosovarëve, misionarëve të Kryqit të Kuq, plagosja e një shtetasi amerikan, vrasja e dy vëllëzërve në Krumë e të tjerë. Të gjitha këto ngjarje tha Paloka dëshmojnë se rendi në Kukës ashtu si pjesën më të madhe të Shqipërisë, është në gjendje katastrofale./tvklan.al

Gazetare: Ornela Bego