Përballje titulli në Torino
Juve pret Napolin në “Allianz Stadium”
Në javën e dytë të Serie A vjen një përballje e madhe, madje një nga ato që mbajnë aromë titulli kampion.
Juventus pret Napolin në “Allianz Stadium”. Sfidë direkte edhe pse është disi herët për të folur për fundin e kampionatit. Dy skuadrat janë përforcuar ndjeshëm gjatë merkatos së verës.
Juvetus vjen si favorit i padiskutueshëm, jo vetëm nga emri, por edhe nga forma që ka treguar vitet e fundit. Nga ana tjetër Napoli nuk është aspak keq pasi kanë bërë një merkato mjaft cilësore.
Kjo do jetë një përplasje e fortë edhe mes dy strategëve më të mirë të momentit në kampionatin Italian. Maurizio Sarri dhe Carlo Ancelotti do mundohen të bëjnë diferencën. Sarri me sa duket ka lënë pas problemet shëndetësore dhe me shumë mundësi do jetë në stol përballë ish-ekipit të tij.
Duhet thënë se Napoli ka disa ndryshime të bëra nga tekniku Ancelotti, por në thelb mbetet e njëjta skuadër që ndërtoi pikërisht Sarri. Futbollistët e dy ekipeve vijnë pa komplekse në këtë takim pasi fituan ndeshjet e para të sezonit. Juve mposhti 1-0 Parmën në ndeshjen hapëse, ndërsa Napoli fitoi 4-3 në një transfertë mjaft të vështirë me Fiorentinën.
Tv Klan