Përfundon trajnimi i policëve të Fierit nga MAPE – (5 Dhjetor 2000)
Lajme Arkiva – TV Klan 2000
Ka përfunduar në qarkun e Fierit një trajnim i punonjësve dhe drejtuesve të policisë, nga specialistë të misionit MAPE në Shqipëri. Ky kurs që vazhdoi dy javë, përfshiu uniformat blu nga Mallakastra, Lushnja, dhe Fieri. Specialistët e huaj, i përqendruan leksionet e tyre teoriko-praktike, në çështjet e rendit, krimeve dhe trafikut të qarkullimit rrugor.
Pas largimit të specialistëve të MAPE-s, ky grup do të zhvillojë kurse të përgatitjes profesionale me efektivat e tjerë policor, për zbatimin e rregullave të mësuara gjatë punës së përditshme. Në përfundim të trajnimit pjesëmarrësit u pajisën me dëshmi përkatëse dhe u shpërblyen edhe me nga 10 mijë lekë. Ky ishte edhe aktiviteti i parë publik në të cilin mori pjesë drejtori i policisë së qarkut të Fierit Xhavit Shala./tvklan.al