Policia amerikane vret një tjetër afro-amerikan
Ishte i armatosur vetëm me një thikë
Me 11 plumba e qëlluan për vdekje policët një 31-vjeçar afro amerikan, në qytetin Lafajet në jug të Luizianës.
Trayford Pellerin u qëllua natën e të premtes, pasi nuk iu bind urdhërit të policisë për t’u dorëzuar, teksa autoritetet thanë se ai lëvizte rrugëve me një thikë të gjatë në dorë.
Efektivët thanë se u detyruan të qëllonin pasi nuk u funksionoi shokuesi elektrik, që policët amerikanë përdorin për të neutralizuar personat që nuk u binden urdhërave dhe që bëjnë rezistencë.
Ngjarja nxorri sërish rrugëve të disa qyteteve të shtetit federal të Luizianës, mijëra njerëz kryesisht pjesëtarë të komunitetit afro-amerikan në manifestimet me moton “Jeta e njerëzve me ngjyrë vlen”.
Kjo ngjarje ndodh teksa vijojnë të jenë të larta tensionet që shkaktuan revolta masive në gjithë Shtetet e Bashkuara, pas vrasjes së afro-amerikanit George Floyd më 25 Maj në Mineapolis.
Tv Klan