Policia, pre e rrjeteve sociale
Nisi gjithçka me një video të postuar në Facebook. Dy të rinj lidhin me litar në pjesën e poshtme të krahëve një burrë dhe me anë të kovës së një ekskavatori e mbajnë pezull për pak sekonda mbi një lumë. Një tjetër xhiron skenën për ta hedhur në internet.
Në pak kohë, videoja bën xhiron në thuajse të gjitha agjencitë e lajmeve online. Në mbrëmje, Ministria e Brendshme njofton se policia e kishte hetuar këtë rast. Me anë të një njoftimi zyrtar sqaron se personi i lidhur, K Tafa, 62 vjeç, nga fshati Arrëz i Beratit, është i afërm me dy të rinjtë, Daniel dhe Anxhelo Tafa dhe babain e tyre që xhiroi videon me celular.Nga verifikimet e policisë rezulton se kjo video është bërë për humor dhe se mes të afërmve ka marrëdhënie të mira. Nga njëra anë ky njoftim ndoshta i qetësoi të shqetësuarit në rrjetet sociale dhe tregoi se pre e shakasë nuk kishin rënë vetem ata, por edhe vetë policia. Si për ta përforcuar këtë konkluzion të hetimit policor, autorët dhe protagonistët e kësaj videoje postuan një tjetër xhirim. Me një këngë të Michael Jackson tregojnë se mes tyre ka vërtet harmoni.Po festojnë se ia arritën qëllimit që të tërheqin vëmendjen dhe se u lanë të lirë nga policia. Për protagonizmin në videon që i bëri të famshem, vëllezërit Tafa e shpërblejnë të afërmin e tyre 62 –vjeçar me 100 euro.