Policia Rrugore plan të ri masash në Tiranë: Gjoba për këmbësorët që nuk respektojnë rregullat
Policia Rrugore e Tiranës planifikon që të aplikojë gjobat për këmbësorët që nuk respektojnë rregullat e qarkullimit. Kjo do të kalojë në dy faza. E para do të jetë fazë këshilluese për këmbësorët, e më pas do të fillojnë të aplikohen masat administrative.
“
Nisur nga analizimi i rasteve të fundit të aksidenteve, rezulton se kemi një shtim të shkeljes së rregullave të qarkullimit nga këmbësorët.
-Në këtë kuadër, në zbatim të Planit Masave të Ri janë hartuar disa detyra shtesë si më poshtë:
Vendosje e shërbimeve të Policisë Rrugore apo të Patrullave të Përgjithshme, në vendkalimet për qytetarët në pikat ku ka më shumë lëvizje të qytetarëve, por pa lënë jashtë vëmendjes edhe pikat e tjera, me qëllim monitorimin, këshillimin dhe orientimin e qytetarëve për të respektuar rregullat e Qarkullimit Rrugor.
-Pas një periudhe të caktuar sensibilizuese e ndërgjegjësuese, Policia Rrugore do aplikojë edhe masat administrative për qytetarët që nuk zbatojnë rregullat e Qarkullimit Rrugor”,
thuhet në njoftimin e Policisë Rrugore të Tiranës.
Plani i ri i Rrugores përfshin edhe masa të reja për të shmangur aksidentet dhe rritjen e sigurisë rrugore. Kështu, janë ripërcaktuar disa masa për drejtuesit e automjeteve, që janë:
-Planimetria e vendosjes së shërbimeve.
-Mënyra e kombinimit të radarëve në akset rrugore të brendshme por edhe në akset nacionale që lidhen me Tiranën me qëllim evidentimin dhe ndëshkimin e drejtuesve të mjeteve që qarkullojnë me shpejtësi tej normave të lejuara.
-Koordinimi i shërbimeve me Patrullat e Përgjithshme dhe Shqiponjat duke evidentuar dhe ndëshkuar në kohë, në çdo aks rrugor shkelësit e Kodit Rrugor.
-Kontrolli në mënyrë të pandërprerë me aparatin “Drager” për parandalimin e përdorimit të alkoolit gjatë drejtimit të mjetit.
Policia Rrugore e Tiranës sqaron se gjatë 24 orëve të fundit janë pezulluar 32 leje drejtimi, nga këto:
-21 për shpejtësi tej normave të lejuara
-8 për drejtim mjeti nën ndikimin e alkoolit
-3 për drejtim mjeti në sens të kundërt
Janë vendour 61 masa administrative për mospërdorim të rripit të sigurimit:
-37 masa për përdorim të celularit gjatë drejtimit të mjetit
-31 për mosvendosje të kaskës mbrojtëse
-87 për shpejtësi tej normave të lejuara, shkelje të semaforit, apo për mangësi të tjera teknike ose në dokumentacion.
/tvklan.al