Presidenti Nishani takon Kardinalin Parolin
Një ditë pas shpalljes shenjtë të Nënë Terezës, Presidenti i Republikës, Bujar Nishani u prit në një takim nga Sekretari i Shtetit të Vatikanit, Pietro Parolini dhe ndoqi meshën e falënderimeve të kryesuar nga Kardinali, për shenjtoren shqiptare.
Në takim, kreu i shtetit i shprehu falënderimet për shenjtërimin e Nënë Terezës dhe vendimin e Atit të Shenjtë, Papa Françeskut, për të lumturuar 38 klerikët e martirizuar nga regjimi komunist. Shenjtërimin e quajti si ngjarje të papërsëritshme për shqiptarët. Në bisedën që pati me Presidentin Bujar Nishani, Kardinali Pietro Parolini vlerësoi harmoninë fetare në Shqipëri duke e konsideruar atë një shembull të shkëlqyer për një Evropë shumë - kulturore.
Kreu i shtetit bashkëbisedoi me Kardinalin Parolin edhe për zhvillimet në rajonin e Ballkanit Perëndimor dhe në Bashkimin Evropian, duke theksuar rolin e Shqipërisë në Rajon dhe duke evidentuar progresin e bërë në rrugën e afrimit me Bashkimin Evropian.
“Jemi të ndërgjegjshëm për sfidat serioze me të cilat përballet sot Unioni, por ne jemi të vendosur për të vijuar me reformat e nevojshme që do t’i mundësojnë vendit integrimin në Bashkimin Evropian, i cili mbetet projekti më madhor aktual i shqiptarëve”
– u shpreh Presidenti. Duke u ndaluar në çështjen e Kosovës, ai vlerësoi vëmendjen e Selisë së Shenjtë në procesin e negociatave të pajtimit mes Prishtinës dhe Beogradit, duke shprehur besimin se së shpejti edhe Vatikani do të njohë shtetin e pavaruar të Kosovës. Tv Klan