Publikohet traileri i ‘Game of Thrones – House of Dragons’
Rrjeti televiziv amerikan HBO ka publikuar trailerin e serive të “Game of Thrones – House of Dragos”. Seritë e reja të një nga serialeve më të ndjekura të të gjitha kohërave do të pasqyrojnë historinë 200 vite përpara ngjarjeve të “Game of Thrones”.
Seriali do të ketë 10 episode dhe do të flasë për familjen Targaryen dhe lidhjen e tyre me dragonjtë.
Aktori Matt Smith do të jetë një Targaryen. Në trailerin e publikuar, ai dëgjohet duke thënë “Perënditë, mbretërit, zjarr dhe gjak. Ëndrrat nuk na bënë mbretër, dragonjtë na bënë”.
Matt Smith do të jetë në rolin e Princit Daemon Targaryen dhe është përshkruar nga HBO si një luftëtar i fortë, në venat e të cilit rrjedh gjaku i vërtetë i dragoit.
Personazh është edhe vëllai më i vogël i Mbretit Viserys Targaryen, që do të luhet nga aktori Paddy Considine.
Ndërsa aktorja Olivia Cooke do të luajë rolin e Alicent Hightower, e cila konsiderohet si “gruaja më e bukur në 7 Mbretëritë”, ndërsa aktorja Emma D’Arcy do të ketë rolin e princeshës Rhaenyra Targaryen, fëmija i parë i mbretit.
Pjesa më e madhe e xhirimeve janë bërë në Angli. Seriali i shumëpritur do të transmetohet në rrjetin HBO në vitin 2022. /tvklan.al