Rama: Nga rindërtimi përfitojnë 11 bashki
Nis shpërndarja e granteve në Vorë dhe Rrogozhinë
Ka nisur dhënia e granteve të mermetimit për qytetarët në Vorë dhe Rrogozhinë, banesat e të cilëve u dëmtuan pjesërisht nga tërmeti i 26 Nëntorit. Kryeministri Edi Rama gjatë një komunikimi online me kryetarin e Bashkisë së Vorës dhe me kryetaren e Bashkisë së Rrogozhinës bëri të ditur se në total për këto dy njësi vendore janë 1159 familje që përfitojnë drejtpërsëdrejti pagesat e granteve për riparimin e dëmeve të shtëpive të tyre.
“Në Bashkinë e Vorës kemi 365 përfitues për dëmet e lehta fare, 329 përfitues për dëmet e shkallës së dytë dhe 115 përfitues për dëmet e shkallës së tretë. Në total janë 176 milionë e 250 mijë lekë të cilat iu kalojnë drejtpërdrejtë familjeve. Në Rrogozhinë kemi rreth 1.1 milionë dollarë që do të shpërndahen për të gjitha familjet e dëmtuara, për të bërë meremetimet sipas niveleve të dëmit”.
Në rang vendi do jenë 11 bashki që do të përfitojnë nga projekti i rindërtimit, ndërsa qeveria ka vendosur në dispozicion afro 80 milionë dollarë, nga të cilat do përfitojnë edhe ata që i kanë kryer vet riparimet.
“Shuma e mbështetjes do të shkojë rreth 80 milionë dollarë, gjë që krijon pa diskutim premisën që të gjitha familjet e dëmtuara të kenë mundësi të kryejnë meremetimet, apo në rastet kur i kanë kryer, të kompensohen për shpenzimet e bëra, sepse i takon qeverisë t’iu qëndrojë të gjithëve pranë dhe askush të mos mbetet vetëm në këtë proces”.
Kryeministri bëri të ditur se shumë shpejt do të nisë edhe prishja e banesave kolektive që janë të pariparueshme, ndërsa shprehu bindjen se kudo ku do ketë komplekse ndërtimesh të reja, cilësia e jetës do të jetë komplet ndryshe me atë që ishte deri para tërmetit të 26 Nëntorit.
Tv Klan