Rikthehen Facebook, WhatsApp dhe Instagram
Rrjetet sociale Facebook, WhatsApp dhe Instagram u rikthyen në funksionim pas më shumë se 6 orësh ndërprerje totale në të gjithë botën.
Facebook, kompania që ka në zotërim edhe WhatsApp e Instagram, thotë se shkak i mosfunksionimit ka qenë ndryshimi i gabuar i konfigurimit të sistemeve të brendshme të kësaj kompanie.
Të tre rrjetet sociale ishin tërësisht jashtë funksionit në të gjithë botën për rreth 6 orë. “Downdetector”, një faqe që gjurmon rëniet e faqeve online, tha se ky ishte dështimi më i madh i rrjeteve sociale që kishte parë ndonjëherë, me 10.6 milionë probleme që u raportuan në të gjithë botën.
Pavarësisht vështirësisë për të zgjidhur problemin, Facebook njoftoi se asnjë e dhënë personale e përdoruesve nuk është kompromentuar.
Ndërsa themeluesi i Facebook, Mark Zuckerberg, u kërkoi falje përdoruesve të cilët u prekën nga rrëzimi i faqeve. /tvklan.al