Rinasi me probleme sigurie pas sulmeve terroriste në Bruksel
Aeroporti i Rinasit ka neglizhuar masat e sigurisë edhe pas sulmeve terroriste në aeroportin e Brukselit.
Televizioni Klan zbulon se, dy ditë pas këtyre ngjarjeve, Komisariati i Policisë Kufitare në Rinas, i ka përcjellë një shkresë Tirana International Airport, ku i kërkon bashkëpunim, pas disa konsatimeve për moszbatim të rregullave të sigurisë nga koncesionari në aeroport.
Ermal Milori, në cilësinë e Shefit të Komisariatit, shprehet në letër se, automjetet e kompanive private ose të shoqërive ajrore, të cilat edhe pse të pajisura me leje hyrje, lëvizin me dhe pa arsye për transportimin e personelit jashtë zonës së tyre të operimit, pra në pistën e avionëve, si dhe qëndronin të parkuara në vende jo të sigurta.
Sipas policisë, automjetet e ndryshme, kur dalin nga zona e operimit, brenda pistës së avionëve, nuk shoqërohen me kontroll nga ana e shërbimeve të ICTS - së, gjithashtu edhe personat të cilët janë punonjës brenda pistës dhe hyjnë nga porta A, nuk janë objekt kontrolli në dalje.
Me qëllim rritjen e masave të sigurisë dhe parandalimin e akteve të ndryshme kriminale, në lidhje me personat që punojnë dhe mjetet të cilat operojnë në pistën e avionëve të Aeroportit të Rinasit, Komisariati i Policisë ka kërkuar:
Të mos lejohet dalja e këtyre mjeteve nga territori ku operojnë.
Të kryhet kontrolli si në hyrje dhe në dalje i mjeteve dhe personave.
Të bëhet njoftim paraprak në Komisariatin e Policisë Rinas, në lidhje me arsyen dhe kohën e daljes së mjetit.
Të vihet në funksion të plotë sistemi i kamerave, si në terminalin e Rinasit dhe jashtë tij.
Rezulton se TIA nuk ka kthyer asnjë përgjigje për kërkesat e parashtruara në shkresë. Tv Klan