Rrëzimi i EgyptAir, hetuesit: Në bordin e avionit ka patur një shpërthim
Të dhëna të reja dalin në dritë mbi shkaqet që mund të ketë çuar në tragjedinë ajrore të pak ditëve më parë, ku avioni EgyptAir, fluturimi MS804, i mori jetën 66 pasagjerëve dhe stafit.
Sipas hetuesëve, nga analizimi i trupave të gjetur në vendngjarje, hidhen dyshime të forta se në bordin e avionit ka patur një shpërthim.
Deklarata vjen nga një zyrtar mjekoligjor, identiteti i të cilit nuk bëhet i ditur. Ai mësohet se është pjesë e grupit të hetuesëve egjiptianë, që po ekzaminojnë trupat e viktimave që ndodhen në një morg në Kairo.
Duke folur për
Associated Press
ai tha se 80 pjesët e trupave të gjetura deri më tani janë kaq të vogla sa është gati e pamundur të gjesh një pjesë të plotë. Kjo sipas zyrtarit çon në konkluzionin e logjikshëm që në bord ka patur një shpërthim.
Deri më tani nuk ka patur asnjë konfirmim mbi shkakun që i mori jetën njerëzve të pafajshëm që udhëtonin me avionin e nisur nga Parisi në drejtim të Kajros.
Mesazhet automatike të dërguara pak minuta përpara se avioni të zhdukej nga radarët, orët e para të mëngjesit të së enjten, sugjerojnë ka patur një defekt me dritaret e kabinës së pilotëve, tym në bord, si dhe probleme me pilotin automatik. /tvklan.al