Video/ Sekuestrohet heroinë në doganën e Kakavijes
Një sasi lënde narkotike është sekuestruar në pikën kufitare të Kakavijes.
Mësohet se autoritetet shqiptare kanë bllokuar 1.5 kg heroinë. Në pranga ka rënë një 37-vjeçar nga Fieri në lidhje me këtë rast të trafikut ndërkombëtar droge të mbetur në tentativë.
Elton Ferko po udhëtonte me autobus drejt Greqisë, kur gjatë kontrolleve iu gjet lënda narkotike e fshehur në trup dhe në çantën e tij e ndarë në disa pako.
Njoftimi i Policisë së Gjirokastrës:
Në datën 12.02.2018 shtetasi Elton Ferko është paraqitur në dalje të Republikës së Shqipërisë për të udhëtuar drejt Greqisë me autobuzin e linjës Tiranë – Athinë.
Pas procedurave të kryera në sistemin TIMS nga punonjësit e policisë Kufitare Kakavije, autobuzi është kaluar në vijën e dytë për një kontroll më të imtësishëm.
Nga kontrolli fizik i ushtruar nga punonjësit e Policisë Kufitare shtetasit të mësipërm iu gjetën dy pako në trup dhe një pako në çantën e dorës me lëndë të dyshuar narkotike Heroinë.
Pesha totale e lëndës narkotike rezultoi 1 kilogramë e 520 gramë, e cila u sekuestrua në cilësinë e provës materiale.
Pas veprimeve të para hetimore, Specialistët e seksionit për Hetimin e Narkotikëve në D.V.P Gjirokastër arrestuan në flagrancë shtetasin:
Elton Ferko, 37 vjeç, banues në Fier.
Materialet i kaluan Prokurorisë Pranë Gjykatës së Shkallës së Parë Gjirokastër për veprën penale “Trafikim i lëndëve narkotike”, parashikuar nga neni 283/a/1 i Kodit Penal.
/
tvklan.al