Shkollat verore në Korçë, fëmijët kosovarë – (27 Maj 1999)
Arkiva Lajme – Tv Klan 1999
Dy mijë fëmijë kosovarë do të mësojnë në shkollat verore në Korçë. Drejtori i Drejtorisë Arsimore të Prefekturës së Korçës thotë se ka ditë që kanë filluar përgatitjet për organizimin e shkollave verore. Është përgatitur stafi pedagogjik me mesues korçarë dhe kosovarë.
Po tregohet kujdes në programin arsimor ku të përfshihen të gjitha lëndët dhe çdo klasë vjetore. Ndërsa për shkollat e mesme programi mësimor do të jetë i unifikuar nga Ministria e Arsimit. Fondacionet e huaja dhe komunitetet fetare kanë shprehur gadishmerinë e tyre për të ndihmuar fëmijët kosovarë me pajisje, me libra dhe mjete të tjera mësimore.
Ndërkohë 150 fëmijë kosovarë që me mbërritjen e tyre në Korçë kanë ndjekur mësimet në bankat e shkollave. Këtu jemi në shkollën “Sotir Gura” fëmijët kosovarë të ndihmuar nga bashkmoshataret e tyre korçarë ndjekin mësimin normalisht, duke harruar sadopak të kaluarën e tyre të vështirë.
Shkollat verore për fëmijët kosovarë do të zhvillohen në qytetin e Korçës si dhe në vende të tjera. Me përfundimin e shkollës verore fëmijet kosovarë do të marrin dhe dëftesën e shkollës së tyre të re./tvklan.al
Gazetar – Eduart Frangaj