Skafet me kosovarë vërshojnë drejt Italisë (13 Maj 1999)
Rekord i skafeve drejt brigjeve të Italisë. Një total prej 300 skafesh me refugjatë kosovarë kanë mbërritur gjatë natës së mbrëmshme në portet italiane. Policia dhe karabinierët italianë mbrëmë kanë kapur qindra refugjatë kosovarë, gra dhe fëmijë, të cilët janë dërguar për trajtim mjekësor në spitalin e Otrantos.
Javën e kaluar Italia mori 10 mijë refugjatë në përpjekje për të penguar kontrabandistët që përfitojnë nga situata. Skafistët kërkojnë rreth 540 dollarë për person për të kaluar Adriatikun. Megjithatë fluksi i refugjatëve mbi skafe nuk është ulur.
Madje mbrëmë ka kaluar çdo limit të numrit të mëparshëm në mesnatë duke mbajtur rekord. 300 skafe me qindra refugjatë është një numër i papërballueshëm dhe i pakontrollueshëm për policinë dhe autoritetet italiane./tvklan.al
Gazetar: Eduart Frangaj