Slogani i PD: “Me votën tonë do të ndryshojmë Shqipërinë” – (31 Gusht 2000)
Lajme Arkiva – TV Klan 2000
“Me votën tonë do të ndryshojmë Shqipërinë”. Ky do të jetë slogani i Partisë Demokratike për zgjedhjet lokale të 1 Tetorit. Për herë të parë ky slogan do të paraqitet para demokratëve më 2 Shtator në sheshin Skënderbej, nga ku do të nisë zyrtarisht fushata e PD. Kryetari i degës të Tiranës Vili Minarolli sqaron detajet e organizimit të aktivitetit më të madh të selisë blu.
Vili Minarolli:- “Do të jetë një miting festiv, ashtu siç janë mitingjet e Partisë Demokratike, që ngjallin shpresë dhe optimizëm, mitingje që ngjallin ndjenjën kombëtare të shqiptarit. Do të nderojmë ato figura që i zgjodhëm vetë dhe që do na përfaqësojnë denjësisht në fitoren e 1 Tetorit. Mitingu dhe mitingjet që do të pasojnë do të jenë mitingje larg propagandës demagogjike, larg mashtrimeve”.
Partia Demokratike do të vazhdojë të jetë në sheshe gjatë gjithë kohës së fushatës ka deklaruar Minarolli, krahas bisedave dhe takimeve në salla të mbyllura./tvklan.al
Gazetare – Ornela Bego