Sot ndeshja Vllaznia – Kukësi
Stadiumi i ri i solli fat Kombëtares, ndërsa shkodranët, mbi të gjithë trajneri Armando Cungu, shpresojnë që e njëjta gjë të ndodhë edhe me Vllazninë, që do të luajë për herë të parë në impiantin e rikonstruktuar.
Vllaznia do të bëjë prezantimin në sezonin e ri të Superligës në shtëpinë e saj të re kundër Kukësit, në orën 19:00. Një sfidë e vështirë, por që nuk i ndryshon aspak pritshmëritë e Cungut.
Vllaznia nis kampionatin e ri pas disa sezoneve me të vërtetë të vështirë dhe shumë larg emrit të saj të madh në futbollin shqiptar.
Trajneri shkodran shpreson që gjërat të jenë ndryshe dhe fitorja në ndeshjen e parë do të ishte një nisje e mirë për të harruar të shkuarën.
Në ndeshjen e parë të sezonit kundër Kukësit, Cungu ka në dispozicion të gjithë futbollistët, por afrimet e fundit në merkato dhe problemet me fazën përgatitore, bëjnë që forma fizike e disa lojtarëve të shqetësojë teknikun përpara debutimit.
Tv Klan