Superliga pas javës së tetë, Vllaznia shfaq pretendimet
Teuta në barazimin e 6, Tirana sërish me fitore
Kur duhet edhe 1 javë nga përfundimi i fazës së parë të Superligës, skuadrat janë konfiguruar në renditje me pretendimet reale. Vllaznia nuk është më surprizë dhe fitorja e fundit 1-0 ndaj Partizanit ishte në vazhdën e rezultateve pozitive brenda dhe jashtë fushe. Është i bindur për këtë trajneri Thomas Brdaric.
“Që nga fillimi e kemi menaxhuar mirë, por ka pasur edhe pika të dobëta që jam munduar t’i rregulloj. Rëndësi ka që fituam ndeshjen dhe vazhdojmë në kreun e renditjes. Kam besim të plotë te skuadra”, thotë Thomas Brdaric.
Nga ana tjetër, trajneri Ilir Daja pohoi se Partizani i tij dominoi, sidomos në pjesën e parë, por futbolli i tillë është.
“Nëse i referohemi pjesës së parë, kemi dominuar. Në të dytën loja u zhvillua në mesin e fushës, në atë që quhet thembra e Akilit, kundërshtari na doli superior. Gjithsesi, kur fitojmë, e bëjmë gjithë bashkë, edhe në humbje kemi faj të gjithë”, tha Ilir Daja.
Interesante ishte edhe ndeshja tjetër, Teuta-Laçi, e përfunduar 1-1. Barazimi i gjashtë radhazi për të besuarit e Edi Martinit, por durrsakët janë të vetmit të pamposhtur. Ndërsa Shpëtim Duro merr një pikë në debutim në stolin kurbinas.
“Është një situatë që normalisht rëndon. Diferenca me pikë rritet e të bën të ndiesh përgjegjësi, unë ndjej. Edhe pse mundohemi gjatë javës para portës, mendoj se ishte është çështje fati”, tregon Edi Martini.
“E përgjithshmja është pozitive dhe jam i kënaqur me skuadrën duke pasur parasysh shkallën e vështirësisë së ndeshjes. Laçi duhet të ishte më lart”, thotë Shpëtim Duro.
Në mesin e renditjes, është Tirana që bën biss fitoresh, duke mposhtur 3-0 Apoloninë, dhe ngjitet në vendin e katërt. Por ecurinë më të mirë e ka Kukësi, që nëse nuk do të kishte atë start të keq, sot do të ishte në krye. Verilindorët morën fitoren e pestë radhazi, e fundit 3-1 ndaj Skënderbeut. Për herë të parë sigloi fitore këtë sezon Bylis, duke mposhtur 2-0 Kastriotin.
Tv Klan