Takimi anuluar Majko -Thaçi – (16 Tetor 1999)
Arkiva Lajme – Tv Klan 1999
Hashim Thaçi dhe Pandeli Majko nuk janë takuar sot edhe pse ky takim ishte planifikuar dhe njoftuar zyrtarisht. Sipas zëdhënësit të Majkos takimi do zhvillohej në orën 7 e 45 minuta në zyrën e Kryeministrit Majko. Kryeministri i Qeverisë së Përkohshme të Kosovës pjesmarrës në seminarin “Paqja dhe Siguria në Europën Juglindore” Thaçi, ndonese ka qëndruar dy ditë në Tiranë nuk ka zhvilluar ndonjë takim zyrtar me homologun Majko.
Sipas burimeve zyrtare të Qeverisë Shqiptare shkaku i mos takimit ka qenë teknik. Zëdhënësi i Majkos ka deklaruar se Thaçi do takohet me Majkon pas disa ditësh. Por përveç këtyre duket se ka ndikuar ftohja e vërejtur gjatë vizitës jo zyrtare të Majkos në Prishtinë.
Hashim Thaçi është takuar dje në një pritje në mjediset e Ambasadës Amerikane me kryetarin e sapozgjedhur të PS, Fatos Nanon ku i ka premtuar homologut të tij Nano, se do takohen zyrtarisht pas dy javësh në selinë e PS në Tiranë./tvklan.al
Gazetare – Ornela Bregu