Masakër e përgjakshme në Qendrën Tregtare
Teksas, disa të vdekur dhe dhjetëra të plagosur
Disa njerëz mbetën të vdekur dhe dhjetëra të tjerë u plagosën nga të shtënat me armë zjarri në një qendër tregtare. Ngjarja e rëndë ndodhi këtë të shtunë në qytetin El Paso, Teksas, raporton CNN.
Të plagosurit janë transportuar në spital për të marrë ndihmën e parë mjekësore, janë shprehur autoritet policore për gazetarët.
“Lidhur me ngjarjen e rëndë janë arrestuar tre persona dhe po merren në pyetje”, tha kryetari i bashkisë së El Pasos, për CNN.
Policia njoftoi përmes një postimi në Twitter për incidentin duke u bërë thirrje njerëzve të mos i afrohen zonës ku ndodhi ngjarja tragjike.
Autoritetet nuk kanë ende një numër zyrtar të të vrarëve, por mes viktimave mësohet se ka edhe fëmijë. Dëshmitarë okularë thanë se kanë qenë tre deri në katër persona të veshur me të zeza që hapën zjarr ndaj njerëzve që ndodheshin brenda qendrës tregtare.
Autorët mësohet se kanë shkëmbyer për një orë zjarr me policinë dhe më pas janë arrestuar. Motivet e këtij sulmi të përgjakshëm janë ende të paqarta. /tvklan.al