Thirrje anti-shqiptare përpara KSHZ-së në Maqedoni
Tensionohet situata në Shkup, në një kohë që Komisioni Shtetëror Zgjedhor po shyrton ankesat e opozitës, për parregullsi të zgjedhjeve.
Përpara KSHZ mblidhen prej 23 ditësh mbështetës të VMRO-DPMNE-së, të Nikolla Gruevskit. Anëtarë dhe zyrtarë të saj kanë akuzuar LSDM-në e Zaev, ndërsa nuk kanë munguar edhe ofendimet në drejtim të shqiptarëve.
Duke kënduar këngë patriotike, ata brohorisnin “shqiptarët e mallkuar”.
“Ne e paralajmërojmë KSHZ-në që mos të sjellin vendim të paligjshme, në kundërshtim me vullnetin e popullit të cilët sollën fitoren. Le të mos mendojmë dikush se vuajtëm këta dy vjet do të vuajmë edhe më tej, fitorja është shprehje e vullnetit të popullit. Nuk do të lejojmë askënd për të sfiduar fitoren tonë, rroftë Maqedonia”,
tha Antonio Milloshoski, deputet i VMRO-DPMNE.
Partia e Nikolla Gruevskit ka akuzuar edhe Ambasadorin e SHBA-ve se po përzihet drejtpërdrejt në vendimet e KSHZ-së. Një nga anëtarët e VMRO-së e ka quajtur Ambasadorin amerikan si provokator, por Ambasada i ka hedhur poshtë akuzat.
Edhe mbledhja e KSHZ-së është përshkuar nga tensionet. Ndonëse afati i fundit për ankesat ishte deri në mesnatë, procesi ende nuk ka përfunduar. Aktualisht janë refuzuar 4 ankesa të opozitës.
Tv Klan