Trump përplaset me kryebashkiakun e Londrës
Donald Tramp është vënë edhe një herë në qendër të mediave ndërkombëtare prej deklaratave të tij shumë të diskutueshme. Këtë herë në fokusin e kandidatit të republikanëve për President të Shteteve të Bashkuara të Amerikës, ishte kryebashkiaku i sapozgjedhur i Londrës, Sadiq Khan. Duke iu referuar përkatësisë fetare të qytetarit të parë të Londrës, i cili është i besimit mysliman,Trump tha se në rastin e tij, do të bënte një përjashtim nëse do të zgjidhej president dhe nuk do të aplikonte masën e ndalimit të myslimanëve për të hyrë në SHBA. I menjëhershëm ka qenë edhe reagimi i Sadiq Khan, i cili e refuzoi ofertën e Trump. Kryebashkiaku i Londrës tha se nuk bëhet fjalë për të personalisht, por për miqtë e tij, familjen e gjithkënd që ka një të shkuar si ai. Khan tha se qasja injorante që Trump ka për islamin mund të vërë në rrezik dy vendet. Menjëherë pas sulmit terrorist të San Bernandinos që mban vulën e ISIS, Donald Trump bëri thirrje për ndalim të besimtarëve myslimanë, pasi përfaqësojnë rrezik për SHBA-të.
Tv Klan