Tryeza e të Majtës Europiane në Tiranë – (1 Korrik 2000)
Lajme Arkiva – Tv Klan 2000
Janë mbledhur sot në Tiranë përfaqësuesit e të Majtës Europiane. Iniciativa për realizimin e këtij seminari është e Partisë Socialiste Europiane. Kjo është tryeza e dytë e këtij lloji, pas asaj që u organizua në Shkup vitin e kaluar. Shkëmbime eksperiencash për modernizimin e të Majtës Europiane. Nën këtë moto kanë diskutuar sot përfaqësuesit e të majtës.
Kryeministri i koalicionit të majtë shqiptar Ilir Meta, ka folur sot për zhvillimet politike pas viteve ’90. Kryetari i Partisë Socialiste shqiptare Nano, nënvizoi se forcat e KFOR-it duhen zëvendësuar me misionarë të socialdemokracisë, europiane. Gjinushi ka folur më tej për politikat rajonale në kuadrin e Paktit të Stabilitetit. Përfaqësues të ndryshëm të të Majtës Europiane, që morën fjalën në këtë seminar nënvizuan domosdoshmërinë e europianizimit të Ballkanit.
Të pranishëm në këtë seminar ishin 12 delegacione nga 11 vende të Europës. Në takim ishte i pranishëm edhe Ministri i Mbrojtjes së Greqisë Xoaxopulos. Midis përfaqësuesve të të Majtëve Europian, ishin edhe përfaqësuesit e opozitës serbe, ardhja e të cilëve në Tiranë është komentuar nga PD si bashkëpunim i qeverisë shqiptare me Millosheviçin./tvklan.al
Gazetare – Mimoza Picari