Vaksina “Moderna” mund të frenojë përhapjen e Covid-19
Ekspertët e FDA: Pengon përhapjen e virusit nga të infektuarit
Vaksina e firmës farmaceutike amerikane Moderna mund të frenojë njëherë e mirë përhapjen e koronavirusit.
E përditshmja prestigjoze Wall Street Journal i referohet disa përfundimeve të arritura nga analizat e administratës së barnave në Shtetet e Bashkuara FDA që thonë se kjo vaksinë, përveçse mbron të vaksinuarit nga infektimi me koronavirus, pengon edhe përhapjen e virusit nga personat e infektuar të cilëve u injektohet.
Këtë efekt e ka veçanërisht tek asimptomatikët, tek të cilët infektimi është i dobët. Ndërsa televizioni amerikan NBC citon një dokument të FDA-së ku thuhet se vaksina e Modernës redukton deri në 63% infeksionet asimptomatike pas injektimit të dozës së parë të saj.
Në fillim të kësaj jave, Administrata Amerikane e Barnave publikoi vlerësimin e ekspertëve të cilët e konsideruan efektive vaksinën Moderna, e cila pritet që brenda kësaj jave të marrë aprovimin përfundimtar për përdorim urgjent.
Kjo vaksinë u ka krijuar imunitet 94.1% të personave të cilëve u është injektuar gjatë testeve, ndërsa injektimi do të nisë javën e ardhshme në SHBA.
Tv Klan