Vdekja e aktorit Xhevdet Ferri, Basha: PD e nderuar që e ka pasur në radhët e saj
Lajmi i trishtë për ndarjen nga jeta në mënyrë të parakohshme të aktorit të mirënjohur shqiptar Xhevdet Ferri, i ka lënë të gjithë të pikëlluar.
Edhe kryetari i Partisë Demokratike, Lulzim Basha, në një mesazh të gjatë në Facebook, ka shprehur ngushëllimet e sinqerta familjes së 59-vjeçarit.
“Partia Demokratike ka qenë e nderuar që ka pasur në radhët e saj si deputet për një legjislaturë të Kuvendit të Shqipërisë, artistin Xhevdet Ferri. Humbja e tij, për çdo anëtar të PD dhe për çdo dashamirës të artit shqiptar, është e pazëvendësueshme”, shkruan Basha ndër të tjera.
Ferri u nda nga jeta në moshën 59-vjeçare pas betejës me një sëmundje të rëndë.
Ai e filloi karrierën kinematografike që kur ishte student dhe ka luajtur dhjetëra role si në teatër ashtu dhe në film, por roli më i dashur për publikun ishte ai në filmin “Përrallë nga e kaluara” me regji të Dhimitër Anagnostit. /tvklan.al