Vdekja e nënës dhe foshnjes, lirohen dy mjekët e maternitetit
Helidon Klosi dhe Dritan Deçka, dy mjekët e maternitetit “Koço Gliozheni”, të ndaluar nga policia për vdekjen e 35 - vjeçares Aida Çajka dhe foshnjes së saj janë lënë të lirë, nga Gjykata e Tiranës.
Organi i hetimit kishte kërkuar 45 ditë burg deri në daljen e rezultateve të raportit të mjekësisë ligjore, por togat e zeza nuk u bindën nga argumetat e prokurorisë dhe vendosën detyrim paraqitje për dy mjekët. Ata akuzohen për mjekim të pakujdesshëm, pas denoncimit të bërë nga familjarët e 35 - vjeçares. Por vendimi më lirimin e tyre u prit pozitivisht nga kolegët dhe familjarët e dy mjekëve.
Sipas hetimeve të deritanishme, për më shumë se 6 orë, 35 - vjeçarja u sorrollat në tre spitale, pasi mjekët nuk po përcaktonin diagnozën e saktë.
Pas transportimit në Qendrën Spitalore Universitare dhe Senatoriumin e kryeqytetit, 35 - vjeçarja u dërgua sërish në maternitet, ku në 5 të mëngjesit iu nënshtua një ndërhyrje kirurgjikale. Vdekja e saj dhe foshnjes 9 muajshe, sipas mjekëve, erdhi si pasojë e hemoragjisë së brendshme.
Tv Klan