• Shpërndaje

“U keni shtuar vlerën investimeve në Tiranë”

Kryebashkiaku i Tiranës, Erion Veliaj, ka zgjedhur t’i falenderoj personalisht gjatë një takimi në zyrën e tij disa përfaqësues të Policisë Bashkiake. Ai vlerësoi punën e tyre duke u ndalur në dy momente kyçe gjatë këtij viti.

“Një nga momentet ishte incidenti që patëm me Presidentin e Republikës. E vlerësoj punën tuaj sepse pavarësisht se kush është autoriteti, se çfarë imuniteti ka, apo pavarësisht çfarë detyre shtetërore ka, në këtë qytet jemi të gjithë të barabartë. Momenti tjetër kyç ka të bëjë me parandalimin e një akti të dëshpëruar, që dikush ndoshta edhe për trazimin e tij, e ka menduar si zgjidhje, por fundi i jetës nuk është zgjidhje dhe detyra e policisë është edhe të ndihmoje ne parandalimin e akteve të tilla”.

Veliaj vuri theksin te rëndësia që ka ekipi i Policisë Bashkiake, sidomos në ruajtjen e investimeve të bëra në kryeqytet.

“Nëse ky qytet ka sot një rritje të vlerës së pronës 11.3% vetëm në këtë 6-mujor që kaluam, është edhe falë punës së Policisë Bashkiake. Faktorin kryesor të rritjes së vlerës së pronës në Tiranë, e kanë investimet e bashkisë dhe ruajtja e këtyre investimeve që e bën policia bashkiake”.

Kryeinspektori i Policisë Bashkiake falenderoi kryebashkiakun Veliaj për mbështetjen e dhënë.

Tv Klan