Video/ Samir Mane realizon ëndrrën e fëmijëve

17:53 31/12/2017

"Sot është dita e surprizave, mbi të gjitha në këtë studio kur ne japim premtime duhet t'i mbajmë ato. Pikërisht rasti që do të rikujtojmë nga "Ka një mesazh për ty" lidhet me një nga premtimet që në kemi mbajtur dhe si e kemi mbajtur do ta ndjekim në vijim. Le ta ndjekim së bashku rastin dhe më pas aksionin që kemi bërë".

Një nga kërkesat më të veçanta të "Ka një mesazh për ty" ishte dhe ajo e nxënësve të klasës së pestë nga fshati Blinisht i Lezhës.

Të shpallur kampionë të leximit, pasi për një muaj, secili nxënës i klasës kishte lexuar 24 libra, ata kishin ardhur për të thirrur në program drejtoreshën e bibliotekës së qytetit të Lezhës. Me një makinë të vogël të përshtatur si një bibliotekë lëvizëse, drejtoresha shpërndante libra artistikë në të gjitha shkollat rurale të Lezhës. Por për disa muaj, librat u kishin munguar të vegjëlve të fshatit të Blinishtit.

Realizimi i premtimit filloi që në studio, duke qenë se programi përkoi me fushatën kombëtare të leximit "Takohemi për një libër". Ministria e Kulturës dhuroi libra, por ende një sfidë e madhe mbetej përpara.

E për ta çuar deri në fund këtë ëndërr, Ardit Gjebreas i erdhi në ndihmë një tjetër mik i mirë, biznesmeni Samir Mane.

Ardit Gjebrea: Suela na hodhi dorashkën, na sfidoi, kërkoi libra dhe mendoi që ndoshta do të ishte një mision i pamundur që të siguroheshin mbi 2600 librat që ajo kërkoi. Por për ne nuk ka asgjë të pamundur, sidomos kur ke miq të mirë, nga ata të cilët janë sensibilizuar jo vetëm një herë në program, ja ku jemi së bashku me mikun, biznesmenin aq të suksesshëm Samir Mane, në makinë duke udhëtuar drejt Lezhës për të çuar 2600 libra. Jam shumë kureshtar, i dashur Samir, në momentin që më more në telefon si të lindi dëshira për të realizuar këtë dëshirë që do të thoje se është një ndër më të mëdhatë që ne kemi bërë dhe kemi realizuar në programin "Ka një mesazh për ty"?

Samir Mane: Me të thënë të drejtën dëshira më lindi duke parë emisionin, pashë Suelën (drejtoreshën), e cila me shumë dashamirësi dhe me shumë përkujdesje dhe me shumë çiltërsi kërkoi këtë lloj ndihme dhe donacion për bibliotekën e Lezhës, mendova që të financoj të gjithë projektin e zonjës Suela.

Ardit Gjebrea: Cili është raporti juaj me librin? Sepse dhe që jeni sensibilizuar, besoj dhe mendoj që duhet të keni një raport specifik me të, ndërkohë që sot libri është në zhdukje e sipër, le ta pranojmë edhe këtë gjë.

Samir Mane: Ne fakt unë lexoj shumë, mundohem të gjej kohë për të lexuar. Kryesisht lexoj gjëra që kanë të bëjnë me profesionin tim, literatura, biografi të njerëzve të cilët janë të suksesshëm në ato fusha ku jam edhe unë. Pa dyshim lexoj dhe literatura të tjera sidomos Montefjoren, ato që janë përkthyer në shqip. Këto dhe jo vetëm i kam lexuar të gjitha, kështu që dashuria për librin është dashuria për librin, është një nga ato që më ka ngelur, besoj do e kem edhe për gjatë dhe ky rast specifik më intrigoi që të marr pjesë vetë që t'ju marr në telefon për të shprehur gatishmërinë time për të qenë pjesë e këtij donacioni.

Ardit Gjebrea: A ka ndonjë libër specifik që ka ndikuar në suksesin e biznesit tuaj?

Samir Mane: Pa dyshim që ka shumë të tilla

Ardit Gjebrea: Jam kurioz sepse po të thonit titujt do fillonin të gjithë t'i lexonin që të bëheshin si ju.

Samir Mane: Dy nga më të rëndësishmit në drejtim të profesionit janë: një biografi e Sam Wollton dhe një libër i Jack Wellsh CEO i General Electric. Tani gjithashtu lexoj dhe literaturë të Fridmanit.

Ardit Gjebrea: Le të kalojmë pak tek ky momenti i donacionit. Nuk është hera e parë, se dhe unë vetë drejtohem tek ju, besoj se shumë njerëz drejtohen tek ju. Si i përballoni të gjitha kërkesat sepse Shqipëria ka shumë nevoja? Së pari të falenderoj që nuk më ke thënë jo.

Samir Mane: Pa dyshim që jemi bërë të përgjegjshëm për përgjegjësinë sociale që kemi, natyrisht e dimë që nuk i rregullojmë dot hallet e Shqipërisë dhe shqiptarëve me ato donacione që kemi. Sikur pak të bëjmë, prap është shumë mirë. Për vitin e kaluar kemi shpenzuar 200 milionë lekë dhe në vitin 2018 kemi një fondacion prej 500 milionë lekësh vetëm për donacione të tilla. Natyrisht përzgjedhjet nuk i bëjmë ne sepse hallet janë shumë më të mëdhaja, por ne kemi një sistem që përzgjedh ato që ne kemi mundësi të bëjmë dhe ato që ne mendojmë se janë brenda kuadrit dhe ndihmave që ne japim për njerëzit në nevojë. Shpresoj që ata biznesmenë që më dëgjojnë, me ato mundësi që kanë, të japin sa më shumë donacione, sipas mundësive, që të mund të rregullojmë edhe copëza të vogla.

Ardit Gjebrea: Nga çfarë ju kanë ardhur ju kërkesa?

Samir Mane: Varfëria për vende si ne është diçka shumë e prekshme prandaj ne mundohemi të fokusohemi tek plotësimi i gjërave më të nevojshme: shkollime, bursa, spitale, pagesa operacione, rregullime shtëpiash. etj. Ky është rasti i parë i një donacioni disi të veçantë, për librin dhe rëndësinë e shkollimit, prandaj e pashë si specifikë që të vij vetë.

Ardit Gjebrea: Të falenderoj. Përpara se ne të mbërrijmë edhe pak në Lezhë, me qenë se jemi ne datën 31 dhjetor, cili do të ishte urimi për shqiptarët dhe për Shqipërinë?

Samir Mane: Një vit të ri sa më të bukur dhe të gëzuar dhe 2018-a ti gjejë sa më të lumtur dhe me sa më pak halle dhe më shumë prosperitet dhe dashuri për njëri-tjetrin.

Ardit Gjebrea: Para se të mbërrijmë në Lezhë më lejo që të uroj më të mirat për ty dhe familjen tënde dhe Zoti ta shpërbleftë për të gjithë të mirat që ti bën për komunitetin ku ne jetojmë. Tani do të mbërrijmë në Lezhë dhe mezi pres reagimin e zonjës Suela.

Samir Mane: Në fakt ka dhe diçka tjetër. Dikush më tha pse nuk i çon tek biblioteka e Korçës, por i thashë këtë radhë po i bëj respekte Sandrit:

Ardit Gjebrea: (Duke qeshur) Po, Sandrin e kemi nga Lezha.

Samir Mane: Por natyrisht ne do të jemi pjesë aktive edhe gjatë vitit 2018 për të parë të tilla gjëra nëse mund të plotësohen apo jo interesa të ndryshme të njerëzve në raport sidomos me librin.

Ardit Gjebrea: Kur ka kërkesa të tilla janë edhe frymëzuese.

Samir Mane: Pa dyshim...

Gjebrea dhe Mane mbërrijnë në ambientet e bibliotekës së Lezhës, ku priten nga Drejtoresha e cila i falenderon për këtë dhuratë kaq të vyer.

Ardit Gjebrea: Po tani çfarë do të thuash?

Suela: Tani do të them një faleminderit të madhe.

Samir Mane: Ja ku erdhën librat.

Ardit Gjebrea: Se ishe skeptike pak.

Suela: Isha sepse e dija çfarë po kërkoja, unë e di sa e vështirë është që të mbërrish në atë sasi librash edhe në ato tituj librash, por më zhgënjyet pozitivisht.

Pas prezantimit me drejtoreshën e bibliotekës së Lezhës, ata u njohën dhe me ambientet e brendshme të këtij institucioni.

Gjebrea dhe Mane u mahnitën nga mirëorganizimi i kësaj biblioteke, pasi u informuan që kjo shtëpi e dijes ishte e vetmja në Shqipëri e ndërtuar me projektin për të qenë bibliotekë.

Në tërësi përbëhej nga sektorë të ndryshëm, nga salla e Albanologjisë e cila përmbante një fond të plotë të Gjergj Fishtës dhe shumë ndarje të tjera të rëndësishme të cilat i shtonin larminë e kësaj biblioteke.

Ndarje të veçantë kishte dhe fondi i bibliotekës personale të humanistit italian Domenico Massa, i cili ka shërbyer për 16 vite në Lezhë.

Drejtoresha e bibliotekës u tregoi dhe rregullat e ndryshme të huazimit të librave. Gjebrea dhe Mane u kthyen përsëri në fëmijërinë e tyre, në momentin që vizituan ndarjen e librave për fëmijë duke vëzhguar dhe kartelat e tërheqjes së librave nga të vegjlit.

Me impresione nga më të mirat, u bë dhe shpërndarja e librave të rinj që tashmë do të ishin në funksion të bibliotekës së qytetit të Lezhës. Zonja Suela falenderoi Gjebrean dhe Manen duke treguar mirënjohjen e saj dhe rëndësinë që kishte ky investim për fëmijët dhe të gjithë lexuesit e asaj biblioteke.

/tvklan.al