Video/Përplasen dy trena në Puglia, të paktën 20 të vdekur e mbi 50 të plagosur
Të paktën 20 persona humbën jetën dhe mbi 50 të tjerë mbetën të plagosur, si pasojë e përplasjes ballore të dy trenave të pasagjerëve në rajonin e Puljas, në jug të Italisë.
Mediat në vendin fqinj njoftojnë se fatkeqësisht bilanci i viktimave mund të rëndohet, pasi rreth 18 prej të plagosurve janë në gjendje të rëndë.
Nuk përjashtohet mundësia që të gjenden ende trupa nën rrënojat e mjeteve. Mes të lënduarve ka edhe disa fëmijë. Njëri prej tyre u dërgua me helikopter në spital.
Përplasja e trenave ndodhi në rrethinat e Barit, në Corato.
Siç shihet edhe nga pamjet disa prej vagonave janë shkatërruar plotësisht, si pasojë e përplasjes së fortë.
Prej kohësh autoritetet hekurudhore italiane po punojnë për ndërtimin e një binari të dytë në zonë, në një linjë tejet të frekuentuar, ku kalojnë rreth 200 trena në ditë.
Mediat italiane shkruajnë se një nga hipotezat që shkaktoi aksidentin është ajo e një defekti në sistemin e trafikut hekurudhor.
Kryeministri Matteo Renzi u shprehu ngushëllimet familjarëve të viktimave dhe tha se duhet të zbardhen urgjentisht shkaqet e kësaj tragjedie dhe të dalin përgjegjësit.
Tv Klan