Vrasje e dyfishtë në Tiranë, babai vret djalin dhe veten – (17 Tetor 2000)
Lajme Arkiva – TV Klan 2000
Vret veten pasi ekzekuton me plumb në kokë, të birin tre vjeçar. Vrasja e dyfishtë ka tronditur familjen Zotaj. 35-vjeçari Vladimir Zotaj, oficer i Gardës së Republikës, ka vrarë sot në drekë, djalin e tij Erisin 3-vjeç, i cili po flinte, me një plumb në kokë. Pak minuta më pas oficeri i gardës qëllon po me një plumb edhe veten po në kokë.
Ngjarja e dhimbshme, ka ndodhur në shtëpinë e tyre, në bllokun e pallateve pranë Poligrafikut. Menjëherë në vendngjarje kanë shkuar krerët e Gardës së Republikës, komandanti i saj Arben Çuko dhe zëvendësi i tij, si dhe ekspert e policë kriminal të komisariatit 1 në Tiranë. Dy janë pistat kryesore të vrasjes sipas zyrtarëve të policisë. Gardisti e ka vrarë pa dashje të birin, ndërsa po pastronte armën e tij dhe më pas nga dëshpërimi vret dhe veten, ose vrasjen e të birit e ka kryer me dashje në një krizë nervore dhe po me dashje qëllon dhe veten.
Në kohën kur ndodhi vrasja, në shtëpi ka qenë vetëm oficeri i gardës Vladimir Zotaj me dy djemtë 3 dhe 7 vjeçar. Djali që shpëtoi në momentin e tragjedisë, ka qenë në dhomën e pritjes. Më pas në shtëpi ka vajtur dhe gruaja. Krerët e Gardës e përkufizojnë Vladimirin si njeri normal, të sjellshëm e korrekt. Ndërsa për banorët e lagjes, gjithçka është e mistershme, pasi familja Zotaj sapo kishte ardhur në këtë pallat. Ndërkohë që në familjen Zotaj ka pllakosur zija, në policinë e Tiranës, nisën hetimet për të sqaruar këtë krim të dyfishtë, ku viktima mbetën at e bir./tvklan.al
Gazetar – Eduart Frangaj