Vritet me armë punonjësi i një karburanti në Sarandë. Policia kap në një hotel autorin
E kishte vëzhguar për ditë më radhë pikën e karburantit në dalje të Sarandës dhe në orët e para të kësaj të diele, vendosi ta grabiste me armë.
Ishte ora 3 e 55 minuta, kur me një motor të kuq, një person i armatosur qëlloi mbi Artan Hoxhën, punonjësin e turnit të natës në këtë pikë karburanti në Qafë Gjashtë të Sarandës. Pasi qëlloi me një armë gjahu mbi punonjësin, ai hyri brenda, ku mori shumën e 60 mijë lekëve nga kasa e karburantit dhe u largua me motoçikletën e tij. Gjatë gjithë kohës, ai mbajti në kokë një skafandër për të mos u identifikuar nga punonjësit e karburantit. Autori e qëlloi 44 - vjeçarin Hoxha nga një distancë e afërt, duke e lënë fillimisht të plagosur. Punonjësi i karburantit nuk mundi t’i mbijetojë plagëve të marra dhe ndërroi jetë më vonë gjatë transportimit për në spital. Policia e Sarandës identifikoi si autor të kësaj ngjarje të rëndë 27 - vjeçarin Arqilea Koçi, i dyshuar si përdorues i lëndëve narkotike. Ai u arrestua pak orë pas ngjarjes në një hotel të qytetit. Në pranga ra dhe Mihal Leka, mik i autorit, i cili e kishte ndihmuar të fshihej. Në dhomën e hotelit policia gjeti një pjesë të parave të grabitura, si dhe armën e krimit. Policia ra në gjurmët e tyre pas kqyrjes së kamerave të sigurisë së karburantit, të cilat filmuan të gjithë skenën e grabitjes. Karburantet janë preja e preferuar e grabitësve këto kohë. Pak ditë më parë në autostradën Tiranë-Durrës u grabit një i tillë. Autorët të maskuar morën kasafortën me 10 milion leke të vjetra. Në të njëjtën ditë në Krujë u grabit një karburant tjetër. Tre persona të maskuar dhe me armë morën xhiron ditore./tvklan.al